இந்த பூஜையில் அர்ச்சனைகளும், பரிகாரம் செய்து கொள்பவர்களுக்கு சங்கல்பமும் செய்யப்பட்டு பூஜைகள் நடைபெற்றன. குரு பகவானுக்கு சகஸ்ரநாம அர்ச்சனை செய்யப்பட்டது. சகல விக்னங்களையும் நீக்கும் மஹா கணபதி ஹோமம் தொடங்கி, கிரஹ தோஷங்களை நீக்கும் நவகிரஹ ஹோமமும், நீண்ட ஆயுளை வழங்கும் மஹா ம்ருத்யுஞ்ஜய ஹோமமும், ஆயுஷ்ய ஹோமமும், புத்ர சந்தான பாக்யத்தை வழங்கும் சந்தான கோபால கிருஷ்ண ஹோமமும், சகல சம்பத்துக்களையும் வழங்கும் புருஷ ஸுக்தம் மற்றும் ஸ்ரீ ஸுக்த ஹோமமும், பில்லி சூன்ய ஏவல்களிலிருந்தும், எதிரிகளிடமிருந்தும் பாதுகாப்பு வழங்கும் ஸ்ரீ துர்கா ஹோமமும், கல்வியையும், ஞானத்தையும் வழங்கும் சுப்ரமண்ய காயத்ரி ஹோமமும், தடைபட்டு வரும் திருமணத்தை தடங்கலின்றி நடத்திக் கொடுக்கும் சுயம்வரா பார்வதி ஹோமமும், செல்வத்தை அள்ளித் தரும் குபேர ஹோமமும், சகல நோய்களையும் குணமாக்கும் தன்வந்த்ரி ஹோமமும், இந்த உலகத்திலும், இந்திய நாட்டிலும் எந்த பயங்கரவாத அச்சுறுத்தலும் இல்லாமல் மக்கள் அமைதியான வாழ்க்கை வாழ வேண்டும் என்றும், வறுமை அகல வேண்டும் என்றும், உலக உயிர்கள் அனைத்தும் நோய்களிலிருந்து விடுபட்டு சுகமான வாழ்வு வாழ வேண்டும் என்றும் நாட்டை ஆளும் தலைவர்களுக்கு நல்ல எண்ணத்தையும், மதிநுட்பத்தையும் வழங்க வேண்டும் என்றும் பிரார்த்தித்து இந்திர அபயங்கர ஹோமமும் செய்யப்பட்டது. பின்னர் பூர்ணாஹுதியும்,  வசோத்தாரை ஹோமமும், சிறப்பாக நடந்தேறியது. புனர்பூஜையுடன் பூர்வாங்க, பிரதான, உத்தராங்க பூஜைகள் அனைத்தும் நிறைவு பெற்றன.

பூஜை புனஸ்காரங்கள் பற்றியும், குரு பெயர்ச்சியினால் ஏற்படும் ஜோதிட பலன்கள் குறித்தும் கார்த்திகா குரு பீடத்தின் குருஜி அவர்கள் தெளிவாக அறிவித்து திருஉரை ஆற்றினார்கள்.